Festival della Canzone Gradese

Ricevo e pubblico questo pensiero di Leo sul festival appena concluso, sono reminiscenze un pò tristi del passato.
Io spero per tutti che sia un prologo e non un epilogo, comunque sia grazie a tutti mamuli che ci fate vivere questi momenti.

Prologo al Festival della canzone gradese 2008

“PARADISO
O voi che siete in piccioletta barca, 
desiderosi d'ascoltar, seguiti 
dietro al mio legno che cantando varca, 
tornate a riveder li vostri liti: 
non vi mettete in pelago, ché forse, 
perdendo me, rimarreste smarriti."
(Dante Alighieri)


Stanote (proprio) no rivevo a durmì:
sarà stao forsi pe’ la caligà che se pariceva là, in busata.
Fata note, quela cargaura de siroco la s’à scontrao in mar… e he sbusineo de vento in contrà e mo’ Dio che sbatoceo de scuri…tanto fisso de sconde ‘l scanpanoteo che segna, da secula seculorum, ‘l tenpo de lassù.
Me pensao che, squasi squasi, l’ Anzolo al se vessa logao (reparao) drento in sufita… co duto l’orologio.
Ma quel nero buligheo in sielo, de dito al fato al s’ha quetao, (calmao)…. pareva comò ‘l volessa fame capì gargossa…xè forse un segnal ???
Se stiariza a Levante, ‘na luze biava, puo senpre più forte, me orba e comò ‘na caressa sorze l’arcunbè. Siii alleluia, alleluia al ciaror grando.
In Paradiso, sora del maltenpo, de’ tuni e lanpi, saete e sionere quel batibogio no gera oltro che ‘l prinsipio …a la festa che stà pe’ nasse … i gera, megio, i xè, duti in vagassiòn propio pel bando de ’l festival de la cansòn.
E me pareva de vighili i mamuli nostri, a ciapi, tra ninbi e “celestiali visioni” duti ciapai pel nome de Gravo, li vego la nfondo zuvini, beli e petenai….onidun ‘cufao in avanti, comò in batela o squasi che ‘l stessa pregando in prusissiòn.
A tramontanes Giacometo che, no podendo scrive la puisia de mesanote, al zonta garghe parola per governà i stranboloti.
De fianco Aldo, (duto ciapao), ‘nbarbario, a brontolà co’ do anzuli cherubini perché, dovè (ben) savè, che anche lassù per organizà ‘vol i dindini.
In tera, in pie sora de la bita granda, a dirige Atilio, a bordo dell’Amiralia ancora in Porto, l’orchestra e le megio voze de Gravo che le ‘npissa ‘n canto: in sercio Edy, Eleazaro, Nandy, Mateo, i Subert …e ancora ……… che canto , che comossiòn, un gropo in gola, me score ‘na lagrema che la me impedisse de ricogniussili duti, ma li sento cantà …che festa.
No ve fasso ‘l nome de duti perché, se dovesso demsentgamene gargun sarave stao la fine ….e no solo del sogno.


In desparte, co’ la matita in man, Mario e, rente al nuolo de scrimisìn, Dante co’ i spartiti pusai sui genugi, duti do i se la rieva pensando al saco vecio e sbuso … finemente i lo vegheva de la suso co soso mamuli e mamole a fa’ i baluncini tra le cale. Scusse, stele sul sabiòn…al mondo s’à ribaltao e al Paradiso al xe de soto.
‘Ncora in la, in levante Gilio, duto ciapao a provà un sketch, un testo “delirante e divertente…dal finale irriverente”…tra un cin cin e un hurrà….
Al bando al bando!!!! i siga de lontàn e garghedun riando responde …Canditi…canditi
Ma i Spirti Contempleati, San Pier Damiano e San Benedetto, i fa reciamo ai graisani rispondendo co’ voze forte “al bando si ma solo se cucinate un buon boreto”.
No posso creè ai mie vogi, in quel logo selestial no esiste tenpo e ne orologi, che paze…. ma i graisani, co’ l rie de fantulini, i xè rivai a fa rabià (in Paradiso), i beati cherubini ….beati ?…’na volta
Là in “sielo de le stele fisse” che recorda i Prelati….si lo vego, al xè la ciaro, trasparente, dal portamento fin, al se caressa le mane, comò de scoldassele e pùo co’ i dii ‘l tormenta al quadrato porpora: “Sia lodato Bonsignor Fain…
“fasè i bravi.. e recordeve, ehmm ricordatevi che avete la mia benedizione”… Me scanso, torno ‘ndrio e me apare Santa Cicilia, la caressa ‘na cratura, puo se fa ‘ncontra Jano. Me par comò de veghelo ‘’tel curidòr, che da la sagristia porta ‘n Ciesa, al finì de la predica a Messa Granda”: Jano al scantina ‘l cavo, ‘l’ se giusta i ociai e ‘l se comoda sul trono …l’ organo a sento cane.
Sento do voze, me par de cognosele rotonde e dulsi comò ‘l profumo in contrà co’ i sigheva bussulai, si …ssii, me par ssi, e no me par noo, …ma quel che ciacolà de siguro xè Giovani, Giovani Tronbai che i conta, sentao su le scale de un balaòr che par tanto Culdemuro, comò ‘ntonà voze e strumento all’amigo, rivao de poco. Arturo ‘l camina un giosso vacolo e stanco, ma fiero co soto brasso ‘l so viulin. S’inpigia la Festa e me me sento duto ‘nborassao, (comò che ‘ndesso a torsio) no rivo governà la batela e ili, ‘n coro i me canta: “Graisani steme ben” e saludeme l’Anzolo. L’ Anzolooo????!!!!
Ma comò saludeme l’Anzolo se semo in Paradiso, la casa de ...don don ..e ‘ntanto bate le sete. Don don don, l’anzolo ‘l ze da denovo sul campanil, la logao l’orologio e le canpane torna sonà. I scuri lassa passà un ragio de sol che me orba e me resta inamente na bela melodia: vose, ghitara e viulin ‘n bel canto de Gravo…scusse stele sul sabiòn,
’l mondo ribaltao, al sielo xè de soto,
desso demo voze ‘l Festival
Festival de la Cansòn domilaoto.

Leonardo Tognon