Co belo che gera Gravo!

Ne parlavo ieri pomeriggio con Sandro di un suo post pubblicato su Facebook tempo fa che mi era rimasto nella testa per la sua originalità e bellezza, me lo ha mandato e io lo ripubblico per poterlo condividere con i tanti graisani che si sono aggregati a tutti noi in questi ultimi tempi su internet, E' bello rileggere i suoi momenti di emozione e magia come può succedere solo a Grado.

Geri m'è perso co ste riprese che vevo fato 2 ani fa (ottobre 2010 titola le clip). Gero in tela porta dela botega de stralonga, co è sintio le voze del coro de S.Cecilia (creo che sia quel, no son mundi eferao co stè robe, casomai coregème) che i feva le prove in ciesa dele Grassie.

Cusì è tolto la telecamera e co la fantulina in brasso son ndao drento e……quel odor…..m'è reso conto che gera un monte de ani che no entrevo in ciesa dele Grassie (che purtroppo la ze massa lontan de casa mia, circa 30 metri, quindi la me risulta fora giro…. O___O).

Co è sintio quel odor, son tornao indrio de 30/40 ani, quando che la drento e per le cube in genere, ne vemo cunbinae de duti i culuri. Se le vemo proprio godue noltri, le cube. 

No veveno feisbuc, no veveno scai, no veveno l'icsbocs, no veveno campi de tennis o de golf, in sostanza, no veveno un casso. Ogni tanto solteva fora un balòn e ala sera se zugheva a canditi o a "cerbo". 

Le cerbo(tane), ndeveno a "tole" i città giardino, indola che i siuri, sora dele verande, invesse dele grisiole, i metteva le cane de plastica. E via doppiette, triplete, quadriplete e sinquiplete, e core per le cube….vinti contro vinti….e scampà dale scopèle de Oliver (RIP), co i 'ncargheveno al savial co le cartuce. 

Cognoseveno ogni piera, ogni barcon, ogni balaor e anche ogni teto. No svoleva una mosca senza che nostri no vinisemo a savèlo. E 'l vecio Stoco al magneva i culumbi, e la veccia Mora la piseva in tel albero, e al vecio Capelani al feva stramassi e "ipnotizzazioni" O___O ….gera Bepi Ce, gera 'l Negus, gera Ermì che la canteva, gera Iano che al ne porteva sora al campanil per caregà l'orologio, gera sior Rugero che al veva la machina per gratà al pan e in corte gera la quercia granda! Gera ogni porta una storia, ogni piera una fiaba.

In ciesa dele Grassie, veveno anche un nascondiglio segreto, soto una piera in tel "ribasso". Un nascondiglio indola che nisun a mai messo ninte a parte monade, ma indola che duti, anche senza dili ai oltri, i 'ndeva spesso a cucà, sperando de catà cussà che. Co entreveno in ciesa, gera la gara per cu che ndeva per primo a alsà quela piera. E una volta semo stai premiai…. al solito mona (che no fasso nomi perché che 'l ze restao uguale, uguale, uguale hahaha) l'ha messo soto la piera 500 lire che i veva robao a so nona. Noltri le veveno catae e semo ndai a tosse le luganeghe co la polenta in sagra dei donaturi, drio l'acquedoto….. Hahahah…. e dopo elo, al ze stao becao de so nona e se le ha ciapae davanti de noltri, che se la rieveno de scondòn……"pachignao de un lazarooooon, varda i tovi amici, co bravi, che no i ruba" ….e zò sberle….hahahahah……che ani…. no gera i telefuni azuri quela volta, e le scopele gera al pane quotidiano. Tu te le ciapivi anche dele mame dei oltri, e to mare, i deva sempre ragion a ele……a busta chiusa, perché tanto, za le saveva che geremo comò qui dele favelas 

Eco, quella sera de ottobre, co la fantulina in brasso, è vardao dentro al "ribasso", è serao i oci un attimo e col coro de sottofondo, è rivisùo qui muminti, li è sintì, li è nasai…. le sinquesento lire de carta zala dute fulignae, le è viste, le è tocae….è sintìo le nostre voze che coreva fora della ciesa riàndo….e m'è 'ngropao! 

Co belo che gera Gravo, quanta mularia per le cube, disculsi e coi genugi tacolai. Quanta zente a torsio, duti rieva, duti cuntinti, musica, feste e perfin le scopele de Oliver, in realtà, la ha fato più storia che mal. 

Gno figia, quella Gravo, no la vivarà mai….per quel m'è 'ngropao!!! 

Geri, vardando ste riprese, è provao la stessa sensasion, cusì è fato quatro tagi e le è messe dute insieme, che se geremo "vinti contro vinti", magari, le stesse emosion podarave vivele anche gargun oltro vardando sto video……e 'ngropasse, pensando a quela graisanità vera, che no gera quela decantagia in campagna eletoral, ma gera duto quel che veveno ......e veveno de vantaselo.

Sandro "Buba" Maricchio