Zè note,zè scuro, camino per le cube,
comò liziera bava l'aria de remortisso
la me fà recordà, le antichitae de quele case.
Son solo,finalmente solo
tra quii canpieli,tra quii balauri,tra quele piere,
danovo paron de Gravo mia.
Le strae ormai ganbiae a festa co' piere nove,
no le se ricorda de me, quando sughevo a canditi
su de ele.
L'ombria che se slonga e se scurta,
passando soto i lanpiuni,
par comò ranpigasse,tignisse strenta
su quei pieruni.
Comò le arte dei pescauri ciapae 'ntei grebeni,
che pur stacandose,
le lassa senpre gargossa de ele, tacao là.
Penso e camino,
son zà rivao inte l'androna de la ciesa,
là....là drio,drento la cieseta,
gera 'nà statua de un santo,
che zorno dopo zorno,
pareva che la se moveva.
Quanti ricordi lassai là drento,
tra cuori de grassie e cera descolagia.
Vago avanti longo stralonga,
passo davanti alle "tre corone",
e no vego più la capana de canele
'ndola Valerio al faseva le serade.
Continuo per stralonga,
case che gera cagiue, desso le zè messe a novo,
conprae da sugaduri o zente foresta.
Rivo in savial,
no vego più la casa dei mamuli buni,
solo carieghe e tole,
anche le boteghe dei maringon,
quela de Pompeo e quela de Alberico,
no le zè più,solo carieghe e tole.
Anche la finestra del vecio Stocco
la zè desolagia,desmentegagia,comò i sovi culumbi.
Passo davanti ala Pastora
e me vien dalongo in suca al pisso de carusso
che i feva là.'Ndola al zè finio quel pan?
Also i vogi e vego al balaor dei corcalina,
quanta vita in quele cube
quanti fantulini che i sugheva, i solteva
e i feva festa e garghe volta i riveva al bucal..zò
da la finestra.
'Ndando avanti per le mie,
rivo a casa de Forti,Giovani Forti,là, in campiello tonegasso
'ndola steva anche Palege,ma dopo al fogo
i s'hà spostao.
Davanti steva Ciano pori, proprio in canton de cale Tognon,
ormai stropagia dal simento, 'nà volta per de là se 'ndeva in casata.
Vago avanti,.... el pensier al me porta la de Capelani,
che gera un omo che'l feva pagiuni e .......oltro.
Semo in cul de muro e tornando indrio,
vago danovo per stralonga.
Me fermo in casata,un vero burcelo de fantulini,
là gera senpre batalia ma anche tanta musica.
Una volta steva i Trombai,Niky e Fabio,in parte al mio amico Livio Ciciarolo co' la sova famegia.
De là passo per porta granda,davanti al mitico "massagatti",indola Toni e Walter,i scuminsieva a fà le prime bacanade.
De là vago in acquedotto,
quà se se cateva,a parte comò ritrovo,anche per le feste de paese,le femene le vigniva a lavà e le babeva drento al lavatoio e garghedun anche al pisseva,perchè là gera un dei primi cessi comunali.
Quanti pusti zè gambiai
quante aneme zè 'ndae,
ma stà isola la tien duro
a stè oltre novità. teti dovier
Tanta zente l'ha strasagia
la gno Gravo che hè nel cuor,
anche se la zè ganbiagia
sarà senpre al gnò tesor
podè perde al Palù
cò duto Gravo vecio,
podè perde amchr la cesa granda,
e ancora duti ve cognosse
per graisani:
ma se perdè al graisan,
cu ve cognosse più
Teti
Nessun commento:
Posta un commento