CASA TONDA

 Casa Tonda

Riflessiòn sensa nomi

Casatonda: de siguro pochi i cognosse Zaccaria Gregori, ma al numero 23 de Riva Zaccaria Gregori gera e xè ncora desso, ‘na casa granda a forma de fero de cavalo che se taca co oltre case da via Grego finemente in Paese: per duti a Gravo Casatonda.

Per tanti de noltri che xè nati la Casatonda vol dì:

profumo de nissioi pena lavai in lavatoio, al lavatoio, a fianco dell’entrata co do purtuni scrostai e soro al verde se veghe al maròn e soto al maron de novo al verde e soto ancora color legno, legno pesante, al gera mundi fresco;

finestre e scuri splancai e in curtivo se spandeva la musica de le radio. Cssssssssssssssssssssfiuuuuuuuuuuuuuuuuuuuuu “na poveciassa”, redioregiornali e MusicaPerVoi... a duto volume e garghedun canteva sora e tra i profumi de sugo voleva “La notte” de Adamo, Cin Cin, Elvis, Fiume amaro de la Zanicchi, stronboloti su le cansòn inglisi,

che storie…quante storie

Istae

Casatonda barcuni in sfesa al dopopranso

d'istae...silensio!!?!! 
Baurufe inpissae sensa orario che sintiva duti,

al spande de profumo de pransi poveri ma decisi...sughi, pesse frito, buriti

mamuli che zoga in curtivo,

mamuli co le vate pe’ nda a ganberi,

garghe togna…na tola (regalagia da Sirilo in squero) a forma de stiopo pusagia e disarmagia soto le scale a fianco de do cerbotane e i ossi de persego che garghe mamola steva pianzando… 

omini che torna stanchi dal cantier, da pescà, dal lavòr,

femene che torna co' le borse da la spesa,

fiochi azuri e rosa sui purtuni

panussi a sugà,

pianti a dute le ore…l’à mal de pansa

mamuli che cresse e va a scuola,

oltri fiochi

matrimuni co’ le scale infiorae,

funerai co’ lagreme che bate su le porte de trenta e passa famegie,

biciclete soto al portego,

Siora Giulia Feri che siga,

Duto al mese de magio al rosario co’ l’altar candido in lavatoio,

i fantulini più bravi, co’ al canpanelo a fa’ ‘l giro del la casa,

a le tre so mare de Omero, meso i desparte al bianconero Tuttosport, che inpiseva la preghiera e duti sgraneva al rosario tra i profumi de le rose e de la lissiva, del savòn

che coro de voze…

e verso sera… 

i magiolini sul toco de verde vissìn a le corde pe' sugà, li ficheveno drento le bottiglie de la late, i garbiti,

che feste…duti cuntinti

“ma ste tinti duti “guai a le bici in curtivo...”

istae...lontana mai desmentegagia

istae canottiera bianche, braghe curte, descolso

me recordo i profumi, la zente, i coluri al senso de famegia de la Casatonda

al curtivo, la prima volta co i gogugi in curtivo i xè rivai col scuro a bordo del remorcio de un camion che pareva grando, grando comò un treno

ancora “guai co le bici in curtivo”

inverno ... le mare che bateva al bacalao in curtivo col martelo o co la manera per roverso,

femene che torna dopo esse ‘ndae a peverasse e capelonghe,

al son de la sielta de le peverasse da la cova a la borsa, una melodia un concerto.

Se riveva capiì se gera caparossuli o peverasse, capelonghe de deo o de fero, solo da la nota e via a vendele…

inverno, fredo buora che sbuzina e che scantina le tende in camera

inverno

fumo pe le scale, oduri che se taca sui muri

i ligni pel fogo,

al carbòn pe’ le stufe,

le prime late de kerosene

le prime televisiòn co ‘l stabilizator

ogni giorno al maestro Alberto Manzi co’ Non è mai troppo tardi

la domenega col Campanòn e tutto il calcio minuto pe’ minuto se la squadra del tuo cuore ha vinto brinda con Stock… la Stock di Trieste vi ringrazia …

inverno

le cantine senpre carghe de acqua,

la granda aluviòn

l’odòr de mufa e de odor de fogna…i gati…profumo de marinasso

e oltro…

CASATONDA

d'istae, le angurie de sior Destro...

(siora) Giulia che 'i còre drio a 'i so' fantulini pe'l curtivo via

co' la squela de menestra pe' dài de magnà..

sora de noltri, 'pena 'l dopopranso bonora, oni tanto se sintìva còre e rodolà

pe'l pavimento garghe soldo cagiuo zò de la tola de sior Genio e siora Libera,

che i conteva 'l incasso de la zornada...

a zugà co'i "daci" sul cordolo del marciapie del curtivo...

a zugà co'i decini, vintini e anche i sinquantini (!!!), o le lire vansae del fassismo...

e le mamole co' le cartuline, su'l muro de un color rosa pastelo sbiadio

che squasi no'l se vegheva più e che dopo se vegheva i signi lassai su la malta gratagia via...

a zugà a pèta e co' le figurine, ai giornalini in rifugio, ... al brondolo, a la poma al vaso, ai canditi,

a pindul-pandul... andà a fà malani in squero de Sirilo o drento de le barche de sabion....

"Zoro", co'l so' inpermeabile comò 'l 'tenente Sheridan", che so' mare la ghiteva

la pasta 'vansagia fora del barcon de la cusineta e oni tanto i finiva in suca a gargun...

e via cussì ....

® leonardo Tognon