“LADY” GRAVO
Quando tu te desmissi a la matina
o “lady” Gravo, el sielo se fa rosa;
lisiero ‘l vento basa la marina
e l’aria se fa duta vaporosa.
La vita la scuminsia in quel momento,
cô ‘l sol distua, là suso, ‘l firmamento.
O “lady” Gravo
del mar nuvissa,
de oro tu te vesti a la matina,
d’arzento dopo l’ora vespertina,
e cô ‘l profumo che tu spandi intorno,
o “lady” Gravo,
cô ‘l sol tu dà ‘l bongiorno.
Fonda la note de veludo ‘l sielo;
le stele a miera in alto le scantina
e nel silensio l’eco d’un stornelo
se va perdendo, sempre più in sordina.
L’amor più belo nasse in quel momento,
quando la luna inpigia ‘l firmamento.
O “lady” Gravo
del mar nuvissa,
de oro tu te vesti a la matina,
d’arzento dopo l’ora vespertina
e cô ‘l profumo d’una primavera,
o “lady” Gravo,
tu dà la bona sera!
Nessun commento:
Posta un commento