Che pecao che no è vuo al telefonin co gero mamolo. Quante robe, quanti ricordi, quanti muminti, che i ze solo in tela gno testa, sensa una foto, sensa un video, sensa una slòmoscion.
Me piasarave mundi vè un poche de foto de quando che zugheveno a balòn drio l'acquedoto, tanto per dine una. Miliuni de partie, miliuni de lastre rote, miliuni de lampiuni soltai e miliuni de baruffe, ma nianche una foto. Nianche un video de un gol. Nianche la sodisfassion de podè riveghe una bomba de Aldo Doic. Aah... che che no daravo per vè una slòmoscion dele mussa longa che feveno sul muro del cagarotolo, o de un cuto la dela colona... due bue... tre re... quatro scassa.... cinque con pedina.... e se podarave veghe a ralentator se la pedina la veva tocao veramente al cul... sinò tu va soto. E che che no daravo per vè una registrassion de una partia de pomalvaso drio la ciesa. Miliuni de mamuli che siga, miliuni de zoghi, miliuni de muminti, duti in tela gno testa, ma nianche una foto, nianche un video, nianche una slomoscion. Daravo no se che per ve un bel selfi de gruppo co le squadre che zugheva a cerbo per le cube, duti co le cartuce impirae in tei cavili, con in man le dopiete, le triplete, le quadriplete e dopo gera anche quel che al se veva fato al mitraliator... ma al feva sempre stropòn. E me piazarave mundi ma mundi anche vè fato le riprese video quando che ndeveno dentro al fortino in costrussion.... o dentro la villa Marchesini... o dentro la villa Matilde.... se le vemo fate dute, diese, sento, mile volte, le vemo viste passà da vece a nove, ma nianche una foto.
E si, se vesso vuo al telefonin quela volta, desso me sbavassaravo a vardamele le foto, faravo notolade a vardame i video, de quela Gravo che no la esiste più. E cussà quante robe che podaravo veghe ancora, oltre a quele che me ricordo. Cussà quanti mamuli, cussà quanti particolari, cussà quanti rumuri, che i ze ndai desmentegai per sempre in tel tempo. Vè vuo al telefonin quela volta sarave stao proprio belo.... anche se.... pensanduli ben.... se vesso vuo al telefonin quela volta... saravo stao duto al giorno rincoionìo a vardame al monitor e dute quele bele robe no le varavo nianche vissue...
Che cul che è vuo, a no vè vuo al telefonin co gero mamolo....
E si, se vesso vuo al telefonin quela volta, desso me sbavassaravo a vardamele le foto, faravo notolade a vardame i video, de quela Gravo che no la esiste più. E cussà quante robe che podaravo veghe ancora, oltre a quele che me ricordo. Cussà quanti mamuli, cussà quanti particolari, cussà quanti rumuri, che i ze ndai desmentegai per sempre in tel tempo. Vè vuo al telefonin quela volta sarave stao proprio belo.... anche se.... pensanduli ben.... se vesso vuo al telefonin quela volta... saravo stao duto al giorno rincoionìo a vardame al monitor e dute quele bele robe no le varavo nianche vissue...
Che cul che è vuo, a no vè vuo al telefonin co gero mamolo....da buba
Nessun commento:
Posta un commento