Gnò nono,Tunin "pipa", al gera un sabionante, mestier ormai sparìo del duto. 'Pena scuminsiai i '60, vendua la barca del sabion, al se veva 'mbarcao su una barca de pescauri e a me e a gnò frà al ne porteva scusse perché al diseva che podevemo vendele ai foresti d'istae... Cussì, sul reparo, dalongo drio de la casa Balila, vevemo al nostro banco vendita. Me ricordo ancora i pressi (più o meno...), in lire naturalmente: cape sante a 50, stele marine a 30 o 50 (segondo de la misura), rici de mar a 30, oci de santa Lucia a 20, ciave de San Piero a 15, cavali marini a 20, fasolari a 30, sture (grande) a 150 (mai venduta una, massa care i diseva)... le più richieste gera le stele marine e le cape sante. Me ricordo anche le barufe perché più de gargun al se lamenteva perché al credeva che i fasolari i gera verniciai... noltri i disevemo che le scusse le gera cussì al naturale, ma gera inutile: ili i saveva de più...
Me ricordo che garghe volta gnò nono al ne porteva una mastella de ostreghe de mar, che 'desso le valarave probabilmente una fortuna... Gnò pare ne le deva cò un schisso de limon.
Gera al '64-'65.
PS: l'oltro giorno è comprao fasolari in mercao del pesse, ma i nostri i gera tre volte almeno... (comunque i gera mundi buni...)
Nessun commento:
Posta un commento